Jæja, núna er ég kominn til Bandaríkjanna og búinn að vera í Louisiana fylki frá því á sunnudag. Við byrjuðum á að fara til New Orleans þegar ég kom hingað og við röltum þar um fram á kvöld og borðuðum góðan mat. Þetta er mjög skemmtileg borg og skemmtilegar byggingar í franska hlutanum. Þarna er mjög líflegt næturlíf en við fórum áður en það byrjaði enda var ég ennþá á íslenskum tíma, maður verður jú að eiga eitthvað eftir.

Í gær fórum við til suðurhluta Louisiana og skoðuðum fenjasvæði og verndarsvæði fyrir fugla. Þarna sáum við að sjálfsögðu fullt af fuglum sem maður hafði ekki séð áður og einnig nokkrar eftirlegukindur af snjógæsum en það er fuglinn sem Jón Einar er að rannsaka hérna. Það var gaman að sjá fenjasvæðin en þau eru örlítið frábrugðin leiruviðarskógunum í Asíu. Samt bera tréin sömu einkenni með loftrætur upp úr vatninu. Við sáum einnig nokkra alligatora, beltisdýr og bjórrottu. Beltisdýrið var meira að segja að þvælast alveg upp við bílinn okkar og gátum við skoðað það vel og tekið fullt af myndum.

Í dag er ætlunin að skoða háskólasvæðið hérna í Baton Rouge þar sem Jón Einar býr og á morgun er stefnan á dýragarðinn og sædýrasafnið í New Orleans.

Var að vona að ég gæti sett inn myndir en ég get því miður ekki tengt myndavélina við tölvuna hérna þannig að myndirnar verða að bíða betri tíma

Magnús